الصورة مش كاملة |جريدة الراي

بتاريخ :السبت 05 فبراير 2022

الناشر :شريف   عدد المشاهدات : 311 مشاهدات

كتب : بركات الكريمي 
اي انسان في الدنيا انت بتشوف منه الظاهر بس .. بتشوف منه اللي عاوز يوريهولك  يعني كل انسان بيبقى شايل جواه حاجات مينفعش يظهرها .. وورا الكواليس حكاوي كتيرة انت متعرفش عنها حاجة
يعني اللي شفته رقص في فرح .. ولا اللي قابلك بالصدفة وسلم عليك وهزر معاك .. ولا اللي قابلته قاعد في كافيه غالي .. ولا اللي شفته بيلعب كورة في سهرة خميس ولا حبة بلاي ستيشن .. ولا اللي شفتها لابسة ومتشيكة ورايحة حفلة
كل دول حياتهم مش وردي .. لانهم مش هيعملوا يافطة كبيرة ويعلقوها على صدرهم يقولوا فيها انهم مديونين .. ولا بيلفوا على الدكاترة عشان مرض .. ولا عليهم اقساط متراكمة والبنك عاوز يحجز عليهم ..ولا انهم بيمروا بازمة عائلية .. ولا انه مفصول من شغله وبيدور على شغل , ولا قلبها مكسور ، ولا ضاع منهم حلمهم 
محدش بيصحى الصبح يكتب على صفحته على الفيس بوك انا مديون ولا تعبان ولا متخانق مع مراتي ولا مشكلة النهاردة كذا .. انت بتشوف بس الجزء اللي يناسبك لان لكل مقام مقال .. محدش هييجي يعيط في حفلة ولا حد هيشتكي في فرح .. هما بيعملوا الحاجة اللي بتناسب المكان اللي هما فيه وده مش معناه ان حياتهم ماشية كويس طول الوقت
لو بصينا للناس من الزاوية دي هنفهم أكتر  .. وهنعرف ان كل واحد جواه هم قد البحر .. مشاكل وهموم وضغط الحياة اللي مبيرحمش .. ومحدش بيظهر حاجة لحد ..محدش بيخرج للناس طول ما هو ماشي همومه ولا معلقة في رقبته .. فانت لازم تفهم ان العالم اللي انت شايفه مش ده الحقيقي . فيه عالم تاني ورا كل باب مقفول على اصحابه .. فيه عالم تاني مخفي جوا قلب كل واحد
لو بصينا بالشكل ده وفهمنى المعنى هنرتاح  عارفين هنرتاح ليه لان هنعرف ان الدنيا مش مستقرة .. والكل واخد من الحياة حتة الشقا .. انت مش مرتاح وغيرك برضه مش مرتاح .. لكن انت مش عايش معاه في كواليسه .. انت مش جوا منه عشان تعرف تفاصيله .. يبقى لازم تحمد ربك على اللي انت فيه وتدعي لغيرك ان ربنا ينقذه من كل شر وهم
الصورة مش كاملة .. الصورة ناقصة في الدنيا وهتفضل ناقصة ..وهتفضل برضه تشوف الجزء ..فاوعى في الحياة تحكم على جزء  ولا انك تاخد قرارك على المظهر والشكل العام .. ده اللي جوا بلاوي .. اللي محفور في الصدور لو شفته عند الناس هتعرف انك مش لوحدك وهتحمد ربك الف مرة .. وهتسعى اكتر وهتجتهد اكتر لما الغمامة تتشال من على عنيك .. وتعرف ان محدش مرتاح ابدا ..لانها سنة الدنيا .. ان البشر اتكتب عليهم الشقاء في طريق مفيهوش راحة ابدا .. من يوم ولادتك لحد ما تموت طريق طويل .. مليان حفر ومطبات ومشاكل .. محدش طريقه كان سالك وفاضي .. الكل اتزاحم عشان يوصل .. الكل وقع وقام .. فمتتعبش نفسك في رحلة البحث عن الطريق الوردي .. لانه مش موجود .. مش موجود الا في خيالك وبس

×

❮ ❯