الرضا بقضاء الله

بتاريخ :الاثنين 12 سبتمبر 2022

الناشر :Sohaela   عدد المشاهدات : 760 مشاهدات

 

 

يكتب ....محمود عبد الرحيم 

 

وان قضاء ربنا كلة خير مهما شفت من تعب

الخضر علم سيدنا موسى ركن الرضا عن قدر الله ب 3 مواقف حصلو 

الخضر فى القصة بيجسد قدر الله بيجسد الغيب وانت بتشوفة قدام عينيك بيتحرك كأن ربنا سبحانة وتعالى اراد يعلمنا انة قدرة كلة خير جبلنا حد يجسد الغيب فى صورة بنى ادم يمشى مع سيدنا موسى ويقلة يا موسى انتو بتشفو فى حياتكم نص القصة على انها شر تيجى وتقول لية يارب اكملها معاك للأخر تيجى اورهالك للأخر علشان تعرف ان هيا خير 

انطلق موسى مع الخضر علية السلام فى 3 رحلات لتعلم قدر الله وتعلم الايمان بالغيب واحدة رحلة بحرية - برية – ريفية

 

الرحلة الاولى مع المساكين والغلابة والرحلة ،التانية مع الشباب ،والرحلة التالتة مع المجتمع بين الأغنياء واللأيتام رحلات فى قلب المجتمع وفى قلب احتياجات الناس مش زى الدعاة اللى قاعدين فى برج عاجى بيخطبو فى الناس وبس من غير ما يدخلو جوة الناس ويعالجو مشاكلهم ويحسو بيهم  

من زاوية تانية: الأولى مشكلة الأرزاق وهتيجى ازاى ،التانية مشكلة فقد الأولاد، التالتة تأخر الأرزاق لو حد اتاخر جوازة او شغلة 

اللي بيحصل مع سيدنا موسى زى الل بيحصل معانا انما الخضر هيوريك اخرها دا الدرس ويوريك ازاى الاحداث متناقضة وتقول ازاى حصل كدا وهيا خير 

ربنا مش بيحكيلك قصة وخلاص ربنا عاوزك تؤمن بقدرة وتتعلم من خلال القصص والحواديت

 

الحكاية الأولى : ( شر )  

النص الأول من الحكاية (اللى احنا شيفينة): فأنطلقا حتى اذا ركبا فى السفينة خرقها 

 

سيدنا الخضر (بيمثل القدر) :شاور للبحارة (ناس بسيطة مساكين) بينقلو الناس من شط لشط بالأجرة بيشتغلو على المركب دا .

رفضو ياخدو منة أجرة . أول ما الخضر ركب بص يمين وشمال مالقاش حد شايفة نزل فى قاع السفينة وكسر لوح دخل مية فيها 

سيدنا موسى (بيمثلنا احنا ):غضب قالة بقا الناس عندهم شهامة وركبونا ببلاش وانت تعمل معاهم كدا انت انسان متأمر .

سيدنا الخضر (بيمثل القدر) : قالة مش قلتلك ان مش هتصبر معايا.سيدنا موسى قالة طب تعالى نرجع نسدة قال لا يالة ننزل بسرعة من السفينة ، الخضر من النوع اللي شخصيتة قوية ومش بيدى مبررات لاى حاجة بيعملها ومش بيتكلم كتتير (ودا بيدل ان القدر عادة يكون ساكت بتشوف احداث وانت مش فاهمها ) .موسى قالة انت تعبتنى باللى حصل دا بس هسكت علشان اتفقنا مع بعض من الاول.

 

النص التانى من الحكاية (اللى القدر شايفة): وكان وراءهم ملك يأخذ كل سفينة غصبا:

يعنى لو معملش كدا كانت السفينة الملك خدها منهم 

 

الحكاية التانية : ( شر )

النص الأول من الحكاية : فأنطلقا حتى اذا لقيا غلاما 

وصلو لمجموعة من الشباب الصغير مبلغوش لسة 

سيدنا الخضر (بيمثل القدر) : قعد يدور فيهم كدا وموسى مش عارف هوا بيعمل اية لحد ما وصل لواحد فيهم دخل علية الخضر قتلة 

سيدنا موسى (بيمثلنا احنا ) : قالة اية اللى انت عملتة دا انت قتلت طفل برىء انت ارتكبت خطأ شديد ، الخضر ما ادلوش اجابة 

(زى ما القدر بيجي احيانا ياخد طفل بمرض او حادثة ونقول لية يارب لية ابنى مات)

 

النص التانى من الحكاية (اللى القدر شايفة):: كان ابواة مؤمنين فخشينا ان يرهقهما :

الطفل دا كان ابوه وامة مؤمنين بس هو كان هيطلع فاجر وطاغية هيأذيهم ويأذى المجتمع . فا رحمة ربنا بيهم انة يموت صغير فا يدخل الجنة وهما كمان يدخلو بصبرهم ويعوضهم بواحد تانى رحيم وبار بيهم

 

الحكاية التالتة : ( خير مش فى محلة )

وصولو قرية اهلها واضح انهم ناس بخلا جدا بالرغم انهم اغنيا موسى والخضر كانو جعانين جدا بعد الرحلتين اللى قبل كدا قالولهم عاوزين ناكل رفضو يضيفوهم 

النص الاول :

سيدنا الخضر (بيمثل القدر) : فضل ماشى فى القرية بيدور على حاجة فى الجدران وفى البيوت وموسى مش فاهم بيدور على اية لحد مالقى جدار خلاص هيقع وقف الخضر وقعد يبنى ويصلح فية 

سيدنا موسى (بيمثلنا احنا ) : مقدرش بقا قالة بقا الناس اللى ركبونا ببلاش تخرقلهم السفينة والناس اللى مأكلوناش تبنيلهم الجدار طب خد علية فلوس دوول ناس ما يستحقوش قالة لا وهذا فراق بينى وبينك

(زى ما القدر بيعمل كدا وتيجى تقول بقا اللي ما يستحقش ادالة واللي يستحق ما يخدش )

 

النص التانى من الحكاية (اللى القدر شايفة):: وأما الجدار فكان لغلامين يتيمين فالمدينة :

طفلين ابوهم وامهم ماتو وكانو صالحين وكان فية تحت الجدار دا كنز ولما يكبرو يلاقوة 

 

*** قيس كدا بقا على كل حاجة ف حياتك :

** فاكر المصيبة الفلانية زعلت اووى بس كانت حمياك من مصيبة أكبر أو المشكلة اللى تعباك فى حياتك هيا خير انت مش واخد بالك منة 

** الخضر بيقلك اللى بيحصل فحياتك قد يكون فية خير انت مش عارفة 

** ترضى بقا كل اما يجيلك مصيبة تقول راضى يارب ، اكيد وراها خير تخيل لو عشت بالمنطق دا 

** اتعلم الرضا تعيش سعيد مش محتاج تفكر كتتير ولا محتاج تاخد مهدأت ولا حبوب منومة ولا حاجة 

 

اذا رضيت انك تعيش على ارض الله وتحت سماؤة فأرضى بقضاؤة