مرحلة جديدة للأجهزة الأمنية في مصر بتعيين السيد اللواء عباس كامل منسقاً عاماً للأجهزة الأمنية ـ جريدة الراي

بتاريخ :الخميس 17 اكتوبر 2024

الناشر :انجى باسم   عدد المشاهدات : 77 مشاهدات

مرحلة جديدة للأجهزة الأمنية في مصر بتعيين السيد اللواء عباس كامل منسقاً عاماً للأجهزة الأمنية  ـ جريدة الراي 

د. وائل الضبع ابودوح 

حاجة كدا زي مستشار الامن القومي ف البيت الأبيض المنصب اللى تولاه ف أمريكا هنري كاسينجر وكونداليزا رايس ودونالد رامسفيلد وديك تشيني 

وبالتالي اعلام المطاريد والمرتزقة وإخوان الشيطان 

اللى هيحاولوا يعملوا شو ف الفترة الجاية 

ويقولوا لك اطاحة واستبعاد قول له هو كسينجر ولا رايس لما كانوا مستشار للامن القومي

 في أمريكا دا استبعاد ولا اطاحة.. انما احنا قدام ترتيب جديد للأجهزة الأمنية ف مصر على ضوء عصر جديد من المخاطر شغال وانت شايف قدامك من 7 أكتوبر 2023 المنطقة دخلت حرب إقليمية وصراع بالوكالة بين القوى الدولية..

واللواء عباس كامل كان ع راس جهاز المخابرات في اصعب الفترات ف فترة الحرب على الإرهاب اللى انتصرنا فيها وف صراع إقليمي مع تركيا وقطر لحد ما تمت تسوية الصراع وف صراع ف شرق المتوسط وليبيا ودي كلها انتصارات لا ينكرها الا حاقد لجهاز المخابرات العامة المصرية

اللواء عباس كامل لم يكن مدير مكتب الرئيس عبد الفتاح السيسي لما كان الرئيس مدير جهاز المخابرات الحربية ما بين 2010 و 2012 وبس ولكن كان مدير مكتب الرئيس السيسي لما كان وزير دفاع من 2012 ل 2014 ومن بعدها مدير مكتب رئيس الجمهورية من 2014 ل 2018 .. 

وقبل ما يبقا مدير مكتب مدير المخابرات الحربية اللواء عباس كامل ضابط عتيد ابن سلاح المدرعات ومن بعدها انتقل للمخابرات الحربية طول عمره لحد ما بقا مساعد الملحق العسكري المصري في سفارتنا ف التشيك ومن بعدها بقا مدير مكتب مدير المخابرات الحربية والنهاردة ترقية مستحقة لمنصب المنسق العام للأجهزة الأمنية المصرية والمبعوث الخاص لرئيس الجمهورية وأيضا مستشار رئيس الجمهورية..

الشق التاني من القرار باختيار اللواء حسن محمود رشاد رئيساً لجهاز المخابرات العامة المصرية انه السيد رئيس المخابرات هو ابن الجهاز رغم انه خريج الكلية الفنية العسكرية ولكن للمرة الاولي يبقا رئيس الجهاز تدرج ف وظائف داخل الجهاز لحد ما يوصل لاعلي منصب يعني كل رؤساء الجهاز قبل كدا كانوا من الجيش سواء زكريا محيي الدين وعلى صبري وامين هويدي وحافظ إسماعيل واحمد إسماعيل علي وعمر سليمان ومراد موافي وخالد فوزي والقائمة تطول وكان اغلبهم لازم يبقا ابن المخابرات الحربية ولكن اختيار احد أبناء المخابرات العامة على راس الجهاز يعكس تقدير القيادة السياسية والعسكرية للجهاز بتصعيد جاء من قلب جهاز المخابرات العامة المصرية

التغيير كان طبيعي زي ما حصل في مجلس الوزراء والمؤسسة العسكرية سواء منصب وزير الدفاع او رئيس الأركان وإدارة مكتب الرئيس وقادة القوات المسلحة والرئيس عبد الفتاح السيسي عودنا على عدم الجمود وانه اول كل ولاية رئاسية لازم يبقا فيه مكافات للى نجح ف الولاية بالتصعيد لمناصب اعلي وتصعيد الناجحين من الصف التاني للصف الأول.

ترقية السيد اللواء عباس كامل إلى منصب جديد يليق بقيمته و قيمة ما قدمه للدولة المصرية 

منصب جديد وهو مستشار رئيس الجمهورية 

منسق عام للأجهزة الأمنية والمبعوث الخاص 

لرئيس الجمهورية هو بمثابة إضافة جديدة لقوة مصر المتمثلة في الأجهزة السيادية و الأمنية الراسخة بقيادة قامة بحجم السيد اللواء عباس كامل،

عبء جديد و مرحلة و مهام جديدة يقودها السيد اللواء عباس كامل في مسيرة الدولة المصرية عن طريق التنسيق مابين الأجهزة الأمنية و السيادية و تطوير التواصل و الأداء لخدمة مصالح الدولة المصرية و الحفاظ على إستراتيجيات الأمن القومي.

×

❮ ❯