حبر القلم |جريدة الراي

بتاريخ :الجمعة 19 نوفمبر 2021

الناشر :شريف   عدد المشاهدات : 176 مشاهدات

الشاعر :عاطف محمد

بحبر القلب هاكتب
 كلام مالوش آخر
كلام له  أصول
زى التاريخ زاخر
منقوش على الجدران  
بخط م الفاخر 
ولامره يبقى حطام 
ولا مره يتاخر 
كلامي أصله عنيد 
كلام من الآخر 
ولا كلمة  فيه تتورب
 ولا حتى تتاخر
كل الكلام واضح
ومالوش كذا معنى
واقف كما العنتيل
وصوته سمعنا
أنا اللى هى فى كلامى
وكلامى  له معنى

حبر القلم ع الورق
عمره مايكتب كلمة 
جبانه لمحبه 
عشان ما تتخبى
أول ماتلقى النور
تدارى من خوفها  
تلبس قسى كسوفها  
وطرحة لظروفها 
تدارى جوه الشقوق
عريانه من خوفها 
جوه غيطان الهيش
تندها ما تعديش
حتى حدود القول
كل الكلام عندي
طريقه واحد بس
الصح صح ياناس
والكل لازم يحس
  
فوق السطور
هاكتب كل  الكلام
 ف الحب
واكتب باحبك ياغالية
مهما يطول الدرب
هاكتب بكل انفاسي
من ضفري ولراسي
أنا بيكي لازم أكون
دولة مشاعر صدق
وليها شعب عظيم
ف الحزن بيواسي
ولفرحي وناسي
هاكتب باحبك أنت
يادنيتي وناسي

بحبر القلم هارسم
جمال  لصورة شوق
فيها الكلام قادر
 يرسم عبيره شروق
يزرع أراضى الجفا
أجمل ورود حلوة
سكرها لونه دفا
وأوراقها ضى الوفا
نغماته 100غنوه
يبني مداين سلام
بألف مدنة كلام 
تلقى الأدان فيها
الله أكبر يارب
الدنيا حليها
بكل الصحاب والقرايب
دول أحلى مافيها  

حبر القلم بلل
 سطور الكراسات
كتب القلم بالحبر
كتير  م  الذكريات
وفي نص سكة خطه
قصر فى طول  خطوته  
أعلن بكل صراحة
 السقا رفيق دربنا
بعد ماجاب الميه
 خلصت حياته و مات 
شوفلنا سقى جديد 
علشان يعود العيد 
والميه تملى القلل
والكل يبقى سعيد
السقا مات واندفن
بس الحياه هاتسير
فاكرينه أه بالنعم
عايش ف جوانا
لعمر يوم ننساه 
ماهو برضه ويانا
بس الحياه هاتسير
لو كل سقى مات
ووقفنا عند الموت
أكيد هانرحل معاه
والحارة تبقى سكوت

حبري اندلق مني
 ادونى حبة حبر
جوايا لسه كلام
 علشان حبيبتي البدر
عايز أقول لسه
كلامى لسه كتير
قد السحاب ف السما
كلام بلحظ الوما
عدد الحروف فى اللغات 
وكمان كلام السكات
وكل أوراق الشجر
من أول ما  بدأ الكون
لحد القيامة بساعات 
كلام بعدد النفوس 
وكل حروف القاموس
كلام كمان مخصوص
لذات.  معاليها
الدنيا هى وبس
وكل مافيها 

حبيبتي ليه الخصام
كتبت لك بالحبر 
فوق الحيطان جوابات
ورسمت فيها قلوب
مليانه ألف آهات
والكل شافها وعرف
من لوعة الكلمات
انى باحبك موت
يا سكر الكلمات
ياأحلى م النغمات
يالحن كامل بذاته
منقوش على الاثرات
بلاش الخصام والجفا
ده العمر بيعدي
وكل ثانيه فيه
بتعاني من ودي
ارحم ياغالي الشوق
واسقيني  كل الهنا
واكرمني بزيادة 
دلدلق حنانك بقى
خليه كمان عادة
وأنا ورب الكون
لصون زروع الأمل
 وارويها حنيه 
بميه السلامات
وانادي كل شروق
أنا حبي ده غيه
بطهارة الصلوات 
 

يا بتاع الأحبار
 خلصت ليه بدري
قدامنا ألف نهار
 ووجعنا من بدري
بيشد فينا جهار
علشان يروح يجري
عسعس وهات شيله
الكل مستنيك
قبل الصباح والديك
هيلا هوب يلا وهيله
اركب حصان همتك
وألحقنا بالأحبار
أول ما تيجى الحارة
تلاقينا ف الشبابيك
أوعى تنادى حد
لأحسن هايجروا عليك
ويشدوا ف هدومك 
ويلفوا من  حواليك 
الشيلة عارفه صاحبها 
ولا لينا فيه شريك

×

❮ ❯