السلام النفسي |جريدة الراي

بتاريخ :الأربعاء 22 ديسمبر 2021

الناشر :شريف   عدد المشاهدات : 271 مشاهدات

كتب : بركات الكريمي 
إحنا مش ملائكة و لا بجناحات عشان نعيش حياتنا في صفاء نفسي و نقاء و زقططة 
و لا احنا مواتير حديد تفضل تستحمل سخافات اللي حوالينا 
و لا لمبات موفرة عشان نفضل ننوّر لكلّ حد عايزنا نكون مزهزهين قدامه 

إحنا فعليّا بنوصل لمرحلة السلام النفسي اللي بقى منتشر عند ناس كتير و اللي بردوا كتير مش فاهمُه و مش عايز يتقبلّه مننا 

 السلام النفسي اللي يخلينا عايزين ننام و نصحى وقت محنا عايزين 

نكلم اللي عايزينه بس من غير ما حد يفرض نفسه علينا و يرهقنا معاه بكلامه البشع و بوجهات نظره اللزجة اللي ملهاش أي فايدة بالنسبالنا 

السلام النفسي اللي يخلينا نفضل طول الوقت ساكتين و رافضين أي نقاش سياسي أو مجتمعي أو ثقافي أو حتى ديني 

 السلام اللي بيخلينا نعمل كل حاجه بأريحيّة كده من غير أي عواقب من اللي حوالينا و لا حد ينظر علينا برأيه و يجي في لحظة يعاتبنا عـلى اللي بنعمله 
 السلام اللي بياخدنا و يعيشنا في عالمنا داخل اوضـة صغيرة فيها أباجورة و سرير و مروحـة و لاب و نسكافيـة و كتاب صغير و الصبح نصحى على شغلنا عشان نعرف نجيب لقمة عيشنا و نصلب طولنا 

مرحلة الهروب من كل حاجه حوالينا عشان أصلا إحنا مش لاقيين نفسنا فبنحاول ندور عليها من أول و جديد 
( إحنا مشتاقين لنفسنا و ذاتنا أوووي و لكل حاجه حلوة كانت فينا )

لحظات الصمت اللي بنعيشها دي مش جايه من فراغ أبداً , دي نتيجة تراكمات وصلتنا لمرحلة صعبـة أوي علينا من جوه و إننا فقدنا إحساس لكل حاجه لدرجة اننا مش عايزين نتناقش و لا نتكلم و لا نعرف الحقيقة و لا نخانق دبان وشنا و لا حتى ناكل و نشرب اللي بنحبه 

 كمية البؤس اللي اتملّكنا ده مش عبارة عن إحباط و يأس و خوف و ضعف 
لا لا أبداً  ده بس عبارة عن فقدان ثقة بس مش أكتر و فـي وقت معين كده هنرجع أحسن مـن أيّ وقت فات و بردوا ملكوش حق تحكموا علينا باللي بنمُرّ بيـه

×

❮ ❯