الوقت بيموت

بتاريخ :الخميس 13 يناير 2022

الناشر :tareak   عدد المشاهدات : 237 مشاهدات

كتب د_بركات الكريمي 

الوقت مرعب و بيقسى وبينسى كل حاجة مهما كانت ،بيعالج كل حاجة و بيغير كل حاجة،اللى كان بيحب جامد هينسى جامد واللى كان بيسامح قلبه هيجمد واللى كان خايف من الفراق مبقاش يخاف و اللى كان شايل هم بكرة بقى ف بكرة و واجه كل اللى كان خايف منه واللى الناس باعته ف عز ما أحتاج لهم بقى أقوى منهم كلهم 

 الوقت مرعب فعلا ! مين فينا مفارقش حد مكنش متخيل حياته يوم واحد من غيره ، أحيانا النسيان نعمه والفراق بيبقى مطلوب و إنك تبعد أحسن من إنك تكره و اللى حبوا سنين و عشان غلطة فارقوا واتهد كل اللى ما بينهم و اللى استنوا سنين عشان يقربوا ولما قربوا عرفوا إنهم مينفعوش لبعض ، و اللى ندم على حاجة ضاعت منه وعدى الوقت بقى يحمد ربنا إن الحاجة دى مجتش أو محصلتش ، ويعدى الوقت ونحمد ربنا على حاجات كتير إنها محصلتش كنا هنموت عشان تحصل ، الوقت غريب جدآ ياما أتبدلت أدوار واللى كان بيقلل منك ف يوم بقيت مديره بعدين واللى كان بيقولوا عليه دة ولا فاهم حاجة بقى أقوى منهم كلهم ، واللى راهنت عليه قدام كل الناس ، مشى وساب واللى فضلت تتجاهله أكتشفت إن دة أكتر حد كان مستنى منك القليل .

 حقيقى معادلة الوقت غريبه جدآ ، زى الأيام دى السنة اللى فاتت كنت بعمل حاجات عكس اللى بعملها دلوقتى خالص ، اللى كنت بستنى مكالمته السنة اللى فاتت بيكلمنى دلوقتى حقيقى بكون مش عايز أرد عليه من كتر الأذى اللى بقى بينا ، سبحان مغير مقامات الناس في قلوبنا 

 الوقت بيموت الشغف وبيقتل اللهفة طول ما مفيش مجهود متقدر . التفكير بيتحول تماما ، حاجات كتير كنت بقول مستحيل أعملها عملتها ، حاجات كنت بستغرب فيها غيرى، أتحطيط ف ظروفه عملتها وب إتقان كمان .

 بقى سلامك النفسى أهم من كل حاجة ، بقى السكوت مفتاح الراحة بقى ممكن بمرور الوقت تقفل دايرة صحابك على ٢ أو ٣ بس بطعم الصحاب .

 الإنبهار بيقل مع الوقت ، لمعة كل حاجة فى بدايتها يكاد يكون أختفت ، الفراق بقى عادى و القوة بقيت فى الصبر وحب النفس والذات ؛ و التجاهل أول الحلول ، وبقيت المتعة فى التصالح النفسى .

الوقت بييخليك تدركك ذاتك ونفسك و بيحولك كل يوم من شخص لشخص و هتتفاجىء إنك وصلت للشخص اللى عمرك ما حلمت تكون إنت

×

❮ ❯