سيناريو الحرب العالمية الثالثة بين روسيا وحلف الناتو |جريدة الراي

بتاريخ :الاثنين 07 مارس 2022

الناشر :شريف   عدد المشاهدات : 396 مشاهدات

بقلم/ يوحنا عزمي 

وهو سيناريو مكتوب ومرسوم من سنين طويلة من بعد الحرب العالمية السابقة ومن ايام الحرب الباردة ، وكله موجود في الوثائق القديمة المفرج عنها في الألفية التالتة بالخرائط بالنتايج، مش حاجة جديدة يعني ولو حصل فهما هيمشوا علي السيناريو المكتوب بس لا اكثر ولا اقل.

- هفهمك حاجة الأول سريعا كدة وركز معايا ،
حلف الناتو عنده ثلاثة برامج حربية مهمين اوي ..

- أول واحد هو برنامج اسمه "برنامج الردع النووي" او "المشاركة النووية"، وده معناه ان دول الاعضاء على رأسهم امريكا، بتوزع رؤوس نووية على دول الناتو تستخدمهم في حالة الحرب واستخدام الدول دي في نقل السلاح النووي ده على اراضيها، اما في حالة السلم فـ بتتخزن الأسلحة دي في "ملاجيء الطائرات المحصنة" وبيحرسها افراد من الجيش الأمريكي. 

لحد السنة اللي فاتت ٢٠٢١م فيه ١٠٠ قنبلة نووية متخزنين
في اوروبا بالشكل ده ، مستنيين حالة الحرب ، موجودين
في ايطاليا وهولندا وبلجيكا والمانيا وتركيا وغيرهم ، دا
غير الدول النووية اصلا زي امريكا وفرنسا وانجلترا، وفيه دول تانية زي كندا واليونان ، مستعدين وجاهزين. 

- تاني برنامج هو برنامج "تمرين reforger" وده عبارة عن تدريب سنوي بيحصل من ايام الحرب الباردة لضمان قدرة الناتو على نشر قوات بسرعة في ألمانيا في حالة حدوث نزاع مع حلف وارسو اللي هو روسيا يعني ، بحيث ان القوات تنتشر بسرعة في اوروبا وتفتح سبيل للامداد من امريكا عن طريق المحيط الاطلسي ، وهو عبارة عن اقامة ٣ حاجات مهمة "الجسر الجوي العسكري ، وقيادة النقل البحري العسكري ، والأسطول الجوي الاحتياطي المدني".

- تالت واهم برنامج هو "الضربة الاولى" او الضربة النووية الوقائية ، وده عبارة عن هجوم نووي مفاجيء على دولة عندها نووي اصلا، عشان تدمر ترسانته النووية قبل هجومها فـ تستنزف قوتها النووية ويبقا انتقام الدولة التانية ضعيف وبتكون عبارة عن هجوم على قواعد الغواصات ومنصات الإطلاق ومواقع القيادة والتحكم ومستودعات التخزين.

- فهمتوا البرامج دي؟ طيب ال٣ برامج دول معمولين ليه؟ 

عشان روسيا من زمان وهي كمان عندها خطة مدروسة قوية جدا للرد على ال٣ برامج دول اللي بتكون بدايتها وشرارتها بالنسبة لروسيا ، هي تنفيذ تالت برنامج "الضربة الاولى".

الخطة دي كانت خطة سرية من سنة ١٩٧٩م لحد ما بولندا كشفتها سنة ٢٠٠٥ ايام الانتخابات، وعلى خطى بولندا باقي الدول المشاركة كشفتها هي كمان، الخطة دي اسمها "اسبوع إلى نهر الراين".

حلف وارسو بتاع روسيا زمان ده ، توقع ان لو قامت حرب عالمية تالتة، فهي هتكون بين روسيا والناتو، والبداية هتكون من بولندا، زمان كانت بولندا شيوعية، بس فلنتخيل دلوقتي ان روسيا هددت بولندا واحتلتها زي ما بنشوف التهديدات دلوقتي، ايه اللي هيحصل طبقا لبرنامج اسبوع في الراين؟

- اسبوع إلى نهر الراين ..

الشرارة الأولى وبداية الحرب دي "بالنسبة للخطة" هتكون عبارة عن ان الناتو هينفذ خطة الضربة الأولى في إنه يضرب المناطق العسكرية الروسية في بولندا تحديدا في منطقة وادي نهر فيستولا هناك ، وهتركز ضرباتها كمان على المدن التشيكية ومناطق تعزيزات الجيش الروسي، وتوقعت روسيا ان ضحايا الهجوم ده هيكون وفاة ٢ مليون بولندي ، وتدمير القوة التشغيلية البولندية بالكامل.

- خطة "اسبوع إلى نهر الراين" .. 

اول ما ده يحصل ، روسيا هتعمل ايه؟ هتعمل هجوم نووي مضاد على اوروبا ، مع غزو لاوروبا هيستمر لاسبوع، تضرب فيها ألمانيا وبلجيكا وهولندا والدنمارك وشمال شرق إيطاليا لحد ما تدمر قواتهم الدفاعية تماما ، وهتستثني من الضربة دي فرنسا وبريطانيا "عشان دول عندها نووي" وهنيجي للنقطة دي تحت.

أول نووي هتضربها روسيا هيكون على فيينا بإتنين بوزن 500 كيلو طن ، وبعدين تركز ضرباتها بنووي فردي على قواعد ايطالية اسمها فيتشنزا ، وفيرونا ، وبادوفا ، وتفتح الطريق بعدها للمجر عشان تحتل فيينا.

بعد كدة هتضرب شتوتغارت وميونخ ونورنبرج في المانيا لحد ما المانيا تتدمر تماما، وتفتح الطريق لتشيكوسلوفاكيا والمجر أنهم يحكموا قبضتهم على الأراضي الألمانية، وبعدين تركز ضرباتها على الدنمارك في روسكيلدا وإيسبيرج قرب العاصمة كوبنهاجن والضربة دي لكسر المعنويات الدنماركية بس حسب الخطة ، واخيرا استهداف ميناء ايسبيرج الدنماركي اللي هو ضهر الاسطول بتاع الناتو ، ولو فيه مقاومة يتم قصف اهداف تانية.

خلص الاسبوع ، هيقفوا عند نهر الراين عشان قوات روسيا متنتهكش ، او متضعفش يعني، وبعدين هيحصل توغل تاني لمدة يومين لحد ما توصل القوات لليون في فرنسا في اليوم التاسع، والهدف النهائي هو وصول الجيش الروسي لحد جبال البرانس بين فرنسا واسبانيا ، وتعلن روسيا فوزها بالحرب بس بعد تدمير كامل لبولندا ، والمانيا ، واستسلام اوروبا بالكامل ، وتوقع ان فيه ملايين الضحايا في جميع انحاء العالم بسبب الحرب، وبسبب الاشعاع، مع تدمير تام للطبيعة.

وطبعا مش لازم اقولك ان دول الشرق الأوسط هتدخل قواعد السعودية في باكستان ، وقواعد إيران ، والخلافات الحدودية هتشتعل من جديد ، والضربات النووية نفسها هتدمر الاخضر واليابس على الكوكب كله.

اليومين دول بقا أحداث روسيا وأوكرانيا وتهديدات الناتو رجعت للاذهان السيناريوهات دي كلها اللي بالفعل موجودة ومدروسة ومرسومة من سنين طويلة مع تغييرات بسيطة زي ان المانيا مبقتش شرقية وغربية مثلا ، وزي ان الصين ممكن تدخل كطرف جديد وكوريا الشمالية ، وهكذا ، إلا ان زي ما إحنا شايفين ، خطة الهجوم وخطة الردع الاتنين موجودين بتدريباتهم بقواعدهم ، يعني لو حصل والامر اتطور ، هيمشوا على الخطة عادي بعد تعديل شوية حاجات فيها صغيرة بس.

طبعا دي كلها سيناريوهات وتخيلات ومش لازم حرب جديدة تقوم، دي مجرد توقعات حاطتها رؤوس القيادة والجيش في اوروبا وروسيا، وهتغير شكل العالم اه لو حصلت، بس لك ان تتخيل ان برنامج الحرب نفسه مدروس بشكل ان كل دولة عارفة هي رايحة تضرب مين وهتموت كام وهتدمر ايه وشكل الهجوم هيكون عامل ازاي ، ومدى تأثيره هيوصل لفين.

×

❮ ❯