اللُّدغات وعيوب النطق من المشاكل اللغوية الشائعة التي تؤثر على مهارات النطق والكلام عند الأطفال - جريدة الراى

بتاريخ :الجمعة 01 نوفمبر 2024

الناشر :مى باسم   عدد المشاهدات : 99 مشاهدات

 

بقلم / د. مي باسم 

اللُّدغات وعيوب النطق من المشاكل اللغوية الشائعة التي تؤثر على مهارات النطق والكلام عند الأطفال وحتى الكبار أحيانًا. 
تعد اللُّدغة أو الخطأ في النطق عيبًا صوتيًا يؤثر على وضوح الكلام ويجعل من الصعب فهم ما يقوله الشخص. 
سنستعرض في هذا المقال 
أنواع اللُّدغات
 أسبابها
وتأثيراتها
وطرق العلاج

أنواع اللدغات وعيوب النطق

1. لدغة حرف "س": في اللدغة دي، الطفل بينطق حرف "س" زي "ث" أو بيطلع الصوت مش واضح.

2. لدغة حرف "ر": دي واحدة من أكتر اللدغات اللي بنشوفها، وبيحصل إن الطفل بينطق حرف "ر" زي "ل" أو "غ".

3. لدغة حرف "ش" و"ج": بيبقى الطفل مش قادر ينطق الحروف دي بوضوح، فتلاقيها بتطلع مش مظبوطة.

4. لدغات تانية: زي حرف "ك" أو "ق"، برضه بيكون فيه صعوبة في نطقهم بشكل صح.

 

أسباب اللدغات وعيوب النطق

1. عوامل اجتماعية وبيئية: ممكن يكون بسبب قلة التفاعل مع الناس أو إن الطفل شايف حد حواليه عنده نفس اللدغة.

2. مشاكل عضوية: زي ضعف عضلات الفم أو مشكلة في الأسنان، زي إن يكون فيه تباعد أو الفك مش متناسق.

3. وراثة: ممكن اللدغة تكون ماشية في العيلة، فتبقى وراثية.

4. مشاكل سمعية: لو الطفل عنده مشكلة في السمع، مش هيقدر يميز الأصوات بشكل كويس.

5. التوتر أو القلق: ساعات بيبقى الطفل متوتر وده بيأثر على طريقته في النطق.

 

تأثيرات اللدغات وعيوب النطق

تأثيرات اجتماعية: الطفل ممكن يحس بالإحراج أو يبعد عن الناس عشان مش فاهمينه كويس.

تأثيرات تعليمية: اللدغة ممكن تأثر على تحصيله الدراسي خصوصًا في المواد اللي محتاجة تعبير شفوهي.

تأثيرات نفسية: المشاكل دي ممكن تخلي الطفل دايمًا متوتر وهو بيتكلم.

طرق علاج اللدغات وعيوب النطق

1. جلسات تخاطب: أخصائي التخاطب بيعمل جلسات مع الطفل عشان يعلمه إزاي ينطق الحروف صح ويدربه على حاجات مختلفة.

2. التدريب في البيت: بعد جلسات التخاطب، مهم الأهل يساعدوا الطفل يتدرب في البيت يوميًا عشان يحسن نطقه.

3. تمارين عضلات الفم: تمارين تقوية اللسان والشفتين والفك عشان تقوي عضلات الفم.

4. التدريب على التنفس: التنفس الصح بيساعد الطفل ينطق بطريقة أوضح.

5. علاج السمع: لو فيه مشكلة سمعية، ممكن أجهزة السمع أو تدريبات السمع تحسن النطق.

 

نصايح للأهل

1. اتكلم مع طفلك بوضوح: حاول تتكلم معاه وتديله فرصة يرد ويعبر بكلام واضح.

2. دعمه نفسيًا: بلاش توبخه أو تضحك على طريقته، شجعه إنه يحاول ويديله ثقة في نفسه.

3. شجعه يختلط بالناس: دخله في جو اجتماعي مريح عشان يطور مهاراته.

4. اقراله قصص: القراءة هتساعده يعرف كلمات أكتر ويحسن نطقه.

 

من الاخر "الخلاصة"

التدخل بدري في علاج اللدغات وعيوب النطق بيفرق كتير، وبيساعد الطفل ينطق بطريقة أحسن ويزود ثقته بنفسه.