لعبة الكراسي الموسيقية هي حرب بجد ولا تظبيط للمنطقة ؟ ـ موقع الراي المصرية

بتاريخ :الاثنين 02 مارس 2026

الناشر :طارق الفرماوى   عدد المشاهدات : 65 مشاهدات

وائل الضبع ابودوح 

في وسط الزحمة والخبط اللي بنشوفه كل يوم ناس كتير فاكرة إننا داخلين على نهاية العالم وإن المواجهة بين إيران من ناحية وأمريكا وإسرائيل من ناحية تانية هي خناقة شوارع الكل فيها عايز يخلص على التاني. 

 بس الحقيقة لو ركزت شوية هتكتشف إننا قدام شطرنج محترف مش مجرد ضرب وخلاص. 

الضربة اللي مابتكسرش.. بتأدب 

من سنين والضربات شغالة اغتيالات هنا وعمليات دقيقة هناك بس لاحظ حاجة مهمة الضرب دايماً بييجي في الأذرع مش في الرأس .

 يعني هي عمليات مرسومة بالمنقاش عشان ترسم حدود مش عشان تفتح حرب شاملة. 

هي رسالة بتقول إنت عديت الخط ده.. ارجع مكانك وكأن فيه اتفاق ضمني إن الخناقة ليها سقف وممنوع حد يكسر السقف ده ويوقع البيت على الكل. 

صراع نفوذ.. مش شعارات 

إيران من ناحيتها بتلعب حرب بالوكالة بتحرك قطعها في المنطقة عشان تفضل بعيدة عن النار المباشرة. 

اللعبة هنا مش مين صوته أعلى في الشعارات اللعبة هي مين اللي معاه مفاتيح اللعبة على الأرض؟

السياسة مفيهاش حب وكره فيها دور ومصلحة طول ما طرف دوره شغال ومفيد للتوازن بيفضل موجود أول ما وظيفته تنتهي في معادلة القوة بتبدأ مرحلة الاستبدال أو القصاقيص عشان يظهر نفوذ جديد.

إدارة الصراع.. مش إنهاؤه 

اللي بنشوفه النهاردة هو إدارة خناقة مش محاولة لإنهاء الخصم. 

القوى الكبرى مش عايزة فوضى مطلقة هي عايزة فوضى محسوبة تضمن ليهم إن مفيش حد يكبر زيادة عن اللزوم.

 في العلن هما أعداء وفي الكواليس هما أطراف في شركة مساهمة لتوزيع النفوذ كل واحد عارف حدوده فين بالظبط. 

الخلاصة.. ومين اللي هيكسب؟ 

المنطقة مش في حرب تقليدية بالمعنى القديم هي في عملية إعادة هيكلة بيكسروا الأدوات عشان يغيروا التحالفات. 

وعشان نكون واضحين وسط الدوشة دي كلها مفيش حد هيعيش ويمشي مرفوع الراس إلا اللي

 قراره من دماغه (سيادة حقيقية).

 جيشه سنده (قوة ردع).

 جبهته الداخلية حديد (شعب فاهم وواعي).

ده الوحيد اللي هيخرج من لعبة الاستنزاف دي كسبان والباقي مجرد أوراق بيتم تبديلها على التربيزة.

×

❮ ❯