الحب والوعى اساس التربية _ جريدة الراى

بتاريخ :الأحد 31 اغسطس 2025

الناشر :مى باسم   عدد المشاهدات : 205 مشاهدات

 (طفلك يستاهل الأفضل)

بقلم دكتورة / مي باسم

كل طفل بيتولد صفحة بيضا، بيستنى من أهله يملا حياته بالحب والحنان، مش بالعصبية والغضب. 
الحقيقة إن أولادنا مش "ملطشة" لظروفنا ولا لمشاكلنا ولا لمزاجنا المتقلب. من وهو عنده 3 سنين، دماغ الطفل بتبدأ تخزن مواقف وتجارب ممكن تفضل عايشة معاه العمر كله، سواء كانت حلوة أو وحشة.

مسؤولية الأهل تجاه ولادهم

ابنك مالوش دعوة بحالتك النفسية، ولا بخناقاتك مع أهلك وأصحابك، ولا حتى بظروفك الاقتصادية والفواتير. هو ليه حق يعيش في بيت هادي وآمن، وإنتِ وإبوه مسؤولين عن ده.

لو زقك أو حاول يضربك: ماينفعش تردي بالعنف أو الإهانة. مجرد إنك تمسكي إيده بحزم وبنظرة جادة كفاية توصّله إن التصرف ده غلط.

لو كسر حاجة: لازم نفتكر إنه مش قاصد، ممكن الحاجة تبقى تقيلة عليه أو مش قادر يتحكم فيها. الحل إننا نوفّر له أدوات مناسبة وأمان أكتر.

لو قعد يعيط أو يزن: الزعيق مش هيحل حاجة. انزلي لمستواه وحاولي تفهمي هو عايز إيه. ولو مش مقتنع، سيبيه لحد ما يهدى بنفسه من غير ما تزودي الموقف.

بيت هادي = طفل سوي

البيت الهادي سر في تربية طفل سوي نفسيًا. الطفل مش لازم يعيش وسط خناقات بين الأب والأم، ومش المفروض نسمح لحد يهينه أو يقلل منه. كمان غلط إننا نوصفه قدام الناس بصفات سلبية زي "شقي" أو "مجنني". لو عمل حاجة غلط، الأفضل ناخده بعيد عن الناس ونكلمه بهدوء.

أساليب ذكية تساعد في التربية

ما نلبّيش طلباته فورًا: نستنى شوية لحد ما يحاول يعبر بالكلام.

نسأله أسئلة مفتوحة: زي "تحب تاكل إيه؟" بدل ما نخليه يجاوب بنعم أو لا.

نقرأ معاه كل يوم: الكتب الملونة البسيطة بتقوي خياله ولغته، والأسئلة حوالين الصور بتشجعه يتكلم ويتفاعل.

ليه كل ده مهم؟

لأن التربية بالحب والوعي بتعلّم الطفل إزاي يدافع عن نفسه من غير عنف، وبتنمي مهاراته في التواصل، وبتخليه يكبر في جو صحي بعيد عن الضغوط.

في الاخر احب اقولك 

ابنك مش محتاج أب أو أم مثاليين، هو محتاج حضن يحتويه، وحد يسمعه، وحب من غير شروط. التربية مش أكل وشرب بس، التربية الحقيقية هي بناء شخصية متوازنة قادرة تواجه الدنيا.

×

❮ ❯